KUALJSKE MAŠKARE 2026. Evo druagi ljudi prije nego ča krienete čitati tastament, iz organizacijske struanie Udruge Kualjske mladosti bi van volili reći puar riči o ovogodišnjimi maškarami.

Znuate da smo obliguani bili iznuajmiti šator, a netrebun van ni reći zuač jerbo ćete pročitati posli. Tako da, nuadamo se da ste svi uspili kupiti kuarte i ujti unutra, a mi smo provali to ča bolje sriediti sa ciljun da bi se svi naši ljudi mogli zabaviti ko nekad, a jesmo li to uspili? To ćete vi odlučiti svak zuase, ali ćemo van reći da smo se potrudili i dogodine ćemo se potruditi još jače.

Normalno, uz nuas ima i niz ljudi ki su zamiritali da in se napose zafualimo, a toliko ih je da ni ne znun jesmo li se svih uopće uspili sititi pa nemuojte zamiriti ko nismo.

Tako da:
• Fuala ‘Srdeli fish snack’ ča je duala prostor na korištenje
• Fuala Treši ča na je šankovi posudi
• Fuala našimi traktoristimi: Marinu, Stivenu, Zuoki i Klaudiju, i svima ki su in pomuogli da ti traktori izduraju vo naše selo
• Fuala Barbari ča uvik digitalno poprati svaki nuaš događaj.
• Fuala Stefani ča na je skicu za krnevuala učinila
• Fuala Muati ča na je kuleman posudi
• Fuala Željki ča nas uvik trpi i brine za pićie u bilo kuo doba dana (i noći!)
• Fuala Franku ča je pomoga kolo krnevuala i ča je tastament čita
• Fuala Đurđi ča nan je apartman duala na korištenje ka nemamo backstage
• Fuala Gorici ča je krnevualu gluavu učini
• Fuala Markiju ča nan uvik vozi stvuari kad treba
• Fuala Udruzi Kančuolica ča organizira program i maškare za dicu
• Fuala mlađariji ča se borila 2 dana sa ovin dotičnin krnevualun
• Fuala našemu kuogu Čančuolu i svimi ki su kuhali da nas najidu
• Fuala svimi našimi sponzorimi ki su nas financijski i/ili materijalno pomuogli

I za kruaj, još jedan put fuala svimi vami ča ste bili, namaškarali se, zapivali i zapliesali s namin ili na bilo ki drugi nuačin pridonili i podržali ovu našu lipu, nuajlipšu tradiciju, i da ne zaburavite: MAŠKARE GRIEDU DALJE!!!

Eto, sa morete pročitati:

TASTAMENT KUALJSKIH MAŠKAR 2026.

A ČA ĆEMO SA TASTAMENTUN OVU GODINU… ČINI MI SE DA GA NI

MA JIE JE*** MORUA BITI UNUTRIMI NA STOLU NA POZUORNICI, DONI GA JE SINOĆA

A UNDA NEKA NEKO IDE VITI JELI TAMO DIKOLI, ALI BOJSE NI ČUA O TUOGA SVE I KO GA NUAJDU

MA ZUAČ, NE RAZUMIN, ČA OĆEŠ REĆI?

EA SA ĆEŠ VITI SAMO KO GA DONESU…

(NOSU MUOKRI PAPIRI ZA STUOL GORI)

JESA TI REKA POBRATINE… PRDNI SA U SVIRALU…

MA MUČI, NE GOVORI VIDI SE NEŠTO AJDE ŠKAPULAĆEMO VO ČA VIDIMO

AA TIJEŠKO ALI AJDE AMOĆA VITI ČA MOREMO UČINITI, ALI KI GA JE TO ZALI DA MI JE ZNATI…
JELI KI BI U DOMU SINOĆA???

MA NI GA NIKO ZAAALI, NEGO DOM PROKIŠNJUAVA I KRUOV SE RASPUA BOGATI

AAA JE*** LED ZABURAVI SA JUA NUATO, NIŠĆE JESTE USPILI TO PARIĆATI ČA JE, ČA DOGUAĐA TAMO

OVO POČUAĆAMO PA ČA JE TU JE, ČA JE OSTALO OD NJEGA ĆEMO PROČITATI

PUČE KUALJSKI, DOBAR DAN!

A VIDIN DOSTA VAS SE POSRDELALO VUODE PO VIN NAŠIN LIPIN DOMU, PA BI BI RIED DA VAS

SVIH I POZDRAVIMO, PA UNDA ZA NAŠI UVIK VJERNI TURISTI: DOBRI DEN, GUTEN TAG,
BONŽUR, BUONDŽORNO, BUENOS DIJAS… ISTO TAKO ZA SVI NAŠI VRIDNI RADNICI:
ASSAELAM ALEIKUM, MAGANDANG ARAU, NAMASTE… ETO! NUADUN SE DA SMO SA SVIH POKRILI

PRIVODIMO KRAJU KI ZNUA KIJE MAŠKARE PO RIEDU, ALI DOKLE GOD IH JIE, DOBRO JE.

NATULUMALI SMO SE, NAPLIJESALI I MUHTO NAŽDERALI A SAD JE VRIME DA MALO
PROĆAKULUAMO. LIPO VAS JE VITI U OVAKOVIN BROJU, ČA STUARIH ČA MLUADIH, ČA
MUŠKIH, ČA ŽINSKIIIH I ČA ONIH ČA NE ZNAJU ČA SU.

BITNO DA SI TI ŽINSKE SPOMIENU, AAAAJME MA ČA TI NI DOSTA ŽINSKIH U OVE DVI VEČERI?

MA JIE AMIGO, ALI NI TO ONO ČA JE BILO LUANI, TO SI MORUA VITI… ZAVAGUNALO JE NA
DOMU OD SVITA, TOLIKO DA BI NAŠI KUALJANI DOŠLI DO ŽBRIEGA PA BI SE DOMA TORNALI
JERBO JE RIED BI POTEGUN OD DOMA DO MIRNE, A SA KONTRA BANDE NAMO DO ZABAVIŠTA.
AAA SRCA TI, A KA JE TAKO ZAVAGUNALO ČA NISI UTOPI?

LAKO JE GOVORITI. A KAKO ĆU UTOPITI KA SE CIELA ZGRADA TRIESLA?! SVA VRUATA SU
OTVORENA BILA, MLADOST NI KARAT VIŠE IMALA PA JE NA GUZPAPIR MORALA ULAZNICE
ŠTANCATI, ALI SRIĆA U NESRIĆI ČA SE NAŠI ZAHODI NE KORISTU NI ZA SRATI NI PIŠATI

A BOGAMI NI ZA JE***.

AHAA, ZUATO SU MAŠKARE OVIE GODINE DOLI NA DEPONI… OVOGA IZVINI, NA BATALAŽI?

AE JE** GA ZAMISLI SA DA SI DOŠA NA DOM DANUASKA A NO PUO DOMA SA ZAFAŠUANUN
GLUAVUN, UČ BI TO SLIČILO UNDA MAJKO BOŽJA…

JUA SA ČU I DA JE STATIČAR BI GORI KRUOV PREGLEDATI, ALI KA JE DOŠA GORI, KA JE VIDI NO
RUGLO... IZLAMENA SE JE LIVUN RUKUN DA SE DESNUN MORE ZA SKALE DRŽATI DA NEBI
PJOMBO PUDOLI POŠA. I NUAŠ ČA JOŠ, LJUDI SU MISLILI DA SU MAŠKARE 25.12. JER SU SVI
POČALI U DOM SA KACIGAMIN DOLAZITI, JEDINO JE NAČELNIK BI BEZ KACIGE ALI UN IMA
KUMBULJ STUPE NA GLUAVI PA SVE DA MU I PADE ONUAJ INKARAT NEBI GA NI ĆUTI.

MA AMIGO PUŠTI TO SAD, I VUAJ ISPRI NUAS ĆE SE JOŠ SUN OD SEBE DO KRAJA RUINATI DOK
MI BELENGIJUAMO, NEGO RECI TI MENI KAKOVO JE RIBANJE BILO OVIE GODINE?

A ČA ĆU TI O TUOMU PUNO SRATI, EVO CITIRAĆU TI KAKO JE NUAŠ RUKOMETNI MOZART ZNUA
REĆI. “A NIŠTA. NOVA GODINA, A UVIK ISTO, UVIK NAN UPRAVA DONOSI NOVE RESTRIKCIJE I
ZABRANE I VIŠE MI SE TO GADI, GADI MI SE VO RIBARSTVO, VO JE MENI TRAGIEDIJA I SMIŠNO I
AKO SE ČUA NE PROMINI NEKA SE BRODI DOGOVORU KI ĆE IZUAJTI NA RIBE A MI OSTALI ĆEMO

KUPITI SĆUAPI I POMALO OD MULA DO UOTRIĆA PA NEKA TO BUDE TO”.

(BUBNE ŠAKUN O STUO)

A MUOJ POBRATINE… MENI CERUADA ODUAVNA SLUŽI KO I PUAPI ONUAJ NIKI, NAMISTO NJIE
SA SE DUA U TURIZAM, IMUN APARTMANIĆ, 40 KVADRATI, PRVI RIED DO MORA, CIELO LETO SA
KRCUAT, A NAUČILI SU I MENE KU KOLI BESIDU NA POLJSKI, SLOVENSKI I ČEŠKI.

SVE JE TO LIPO I BUAJNO, ŠUOLDI KAPAJU ALI, RECI MI, PUOČ TI JE NUOĆ?

A TO ĆU TI JUŠTO REĆI POSLI JERBO ME STRUAH KAKO ĆE ME LJUDI PO SELU GLJEDATI, ALI
ONO ČA TI MUOGU REĆI JE DA PRATIN TREND, RAČUNICA JE JEDNOSTAVNA – BRUOJ
KVADRATOV PUTA 10, KAKO DRUGI TAKO I JUA. A I OLIGNE SA UŽUA PO 20 A SAD ISPO 35 NE PITUN.

EA PRIJATELJU, UŽALO JE UMRA A BRUAT MU JE U BUOLNICI JER MU JE INKARAT U DOMU NA
GLAVU PUA. NEMORE TO U NUAPRIDAK, JOŠ KA TRUMP PREUZME GRENLAND NIEĆEMO IMATI
ZA KAFU ALTROKE ZA PIVU A DA NE GOVORIN KAKO SE UŽALO U VILAH HODITI, A KAD SMO
VEĆ KO TUOGA DONESITE NAN GORI JEDNU MRZLU IMAMO MI JOŠ ZA ĆAKULATI, A MORETE
DOVIESTI I JEDNU TIEPLU.

A ČA ĆEŠ CIJENE SU POŠLE U K***, PA Š’NJIMIN I NAŠA TRADICIJA RIBARSKIH NOĆI, A
DOGODINE DA ĆE SE ZVATI I KUALJSKE PUSTINJSKE NOĆI I BITI ĆE ORGANIZIRANE NA TEŠA
PORTIĆU, JERBO KA DUOJDEŠ NAVEČER NA SREDNJU RIVU IMAŠ OSJEĆAJ KODA SI DOŠA NA
DRAŽINE NA IGRALIŠTE. PRVI PUT OD KAD JE RIBARSKIH NOĆI U PROGRAMU NI BILO DEFILEA,
ALI MISLIN NA PRUAVI DEFILE, A NE NA OVUAJ FUALŠI DI MORUAŠ IMATI PROSJEČNU
ŠVICARSKU PLUAĆU I ČLANSKE ISKAZNICE SVAKE ŠUORTE KOLUROV DA BI TE MOŽDA PRIMILI
NA BROD. E ALI POFUALIĆEMO ONUAJ JEDAN BRUOD ČA UVIK VOZI, NETREBAMO GA NI
IMENOVATI JERBO ZNUATE SVI KI JE.

JE** GA SKUPA JE NAFTA ČA SI MISLI, ALI BAR SI SE USPI ZABAVITI NAVEČER SA SVOJIMA NA
ŠANKU, POSLUŠATI MALO DALMATINO, PA POSLI DJ I UNDA…

MA KI DJ?! DI JE TUAJ BI? NA TROKUTU DA TI JE TREBALO ZA SPUAS ŽIVOTA NIKOGA NI BILO,
JUA SA MISLI DA IZ TRAJEKTA NEŠTO SVIRA. NUARODA JE BILO, ALI SVI SU PO PORTIĆIMI
LOKALI, JEBIGA DUOJDEŠ NA ŠANK NARUČIŠ TURU ZA EKIPU, PUC OMA 100 EURI IZ TUAŠKE,
EE SAD NI NI PROBLEM NA BANKOMAT PUOJTI, NEGO ČA NA BANKOMATU NIMA TIH ŠUOLDOV
ČA BI IH POTROŠI NA ŠANKU… ČA POLOKA, ČA POŽDERA

BIĆE SI TI NON-STOP NA MULU BI UNDA?

MISLIŠ NA BANKOMATU ILI NA MULU?

MA NA MULU BOGATI. VIŠ JUA SA OSTUA JER SA NALETI NA OVIH ČA SU NA TUNUARI BILI PA SA
MISLI DA SE MUOGU Š’NJIMIN MIRITI.

EEA NUAŠ KAKO REČU NEKO JE MISLI PA SE POSRA… MA ČA SI TO REKA NEŠTO TUNUARA? ČA
JE I TUOGA BILO PROŠLE GODINE?

A BILO JE ALI ČA ĆEŠ KA JE SAMO JEDAN BRUOD BI I KVOTU SU ISPUNILI U ŠETEMUANU DAN.

JE*** GA, NI NI TO KO ČA JE NEKAD BILO. ALI DOBRO ČA JE TU JE, BITNO DA U NAŠIN
JADRANSKIN MUORU NEMA TUNJEVINE NI ZA LIK, A KAVEZI SE PROSIDAJU I UARMAJU
NANOVO KOLIKO JE GLUAV NUTRIMIN.

A DOBRO TUNUARU NA STRANU, SA ĆU VA JUA DATI VRHUNSKU IDEJU KAKO SE USRATI OD
ŠUOLDOV… EEEEE A ČA JE SVI STE ZAMUKLI I NAĆULILI UŠI OMA, ČIN SE GOVORI O
ŠUOLDIMI, A DA SA VAS PITUA KAKO ĆEMO SA GLUAVNE CESTE VODU SPROVIESTI ĆA UNDA
BI SE SVI GLUHI PRAVILI, ALI DOBRO NASTAVITI ĆU O ŠUOLDIMI KA SA VA VEĆ BUBU U UHO
ZAHITI. VAKO, ČUDI ME KAKO OVI KUALJSKI ŠERLOCI HOLMSI ZA ŠUOLDI JOŠ NISU NAVONJALI
DA OTVORU AGENCIJU ZA UKRCAJ NEPALCOV I FILIPINCOV NA RIBE. EEE MA JUA SA VEĆ
ZAŠTITI TU IDEJU I DOBI AUTORSKA PRAVA. U SURUADNJI SA LUČKUN KAPETANIJUN
DOGOVORI SA (ČITAJ: POTPLUATI) DA SVI TI DOŠLJUACI, KA SKUPU GODINU DAN NAVIGACIJE
MORU POLUAGATI KAPETANSKI ISPIT. TAKO DA NEMUOJTE SE ZABLENUTI KA DOGODINE U
MANILI BUDU SASTANCI I KONFERENCIJE VIEZANE ZA KVOTU NA JADRANU.

A ŠTA ĆEŠ, I TO ĆE RAZJ*** KO I SVE DRUGO… JOPETA SMO POČELI O RIBAMI, ALI KAKO SI TI
PRIJE PUAR GODIN REKA NEMOREŠ PUOJTI NI JE*** A DA O RIBAMI NE GOVORIŠ…

A KO I UVIK TO NEBI NI BILO TO DA SE NE DOTUAKNEMO OVIE NAŠE LIPE I RASPAĐENE
ZGRADE IZA NAŠE KOLUMBE. JUA MISLIN DA SU JOJ ZIDI VIDILI VIŠE LUPIEŠTVA I LUAŽI, NEGO
ČA JE GLUAV TUNJEVINE U SVIMI HRVATSKIMI KAVEZIMI.

MA AJDE UNDA KA JE VEĆ RIEGULA, RECI MI ČA SE VAMO IZA NUAS DOGUAĐA U VUOJ LIPOJ I
KAKO SI REKA NAPOLA PROSEĐENOJ ZGRADI, JELI SVE POD KONTRUOLUN, JELI SVE KAKO
TUKUA, KAKO SU NAN IZBORI PASALI?

A KAKO BOGATI, BOLJE NEGO ČA JE PROŠLI KRNEVUA I SUN MOGA ZAMISLITI! 50 POSTO
PRIJATELJU MUOJ, 50 POSTO, I VEĆINA U VIJEĆU, MA ČAK NI OVUAJ JEDAN MJEŠTANIN ČA JE
PO BARU KRŠI PREDIZBORNU ŠUTNJU I GOVORI ZA KUOGA DA SE GLASA DAN PRIJE IZBOROV NI USPI NIŠTA PROMINITI.

RECI TI MENI SA, KI PUTIN I TITO MORU OVO U RED DOVIESTI,
POKUOJNI DRUG SE VRTI KO NA RUAŽNJU KA VIDI ČA JE VUODE KO NUAS U SELU… ZAMISLI TI
U KIN NALETU JE BI NAČELNIK I U KUOJ EUFORIJI DA PROMINI NEŠTO U SELU, KA SU MU SE
LJUDI NA HAUBU OD AUTA POČALI HITATI I TO SVE NEBI LI GA KALALI I OBESHRUABRILI

A ČA GA SA NIEĆE PROVATI KALATI?

A K*** NIEĆE, ČA NEZNAŠ KAKOVI SU NAŠI MJEŠTANI, A I VIŠE NEZNUN JESU LI MJEŠTANI
JER SE TAKO SAMO NA ISKAZNICAMI VODU, A NEZNAJU OD TRAJEKTA DO OPĆINE DUOJTI, SVI
OĆE SIESTI NA VISOKU KATRIDU, I DA IN KROZ GODINU DAN NAKISAJU OBRAZI I STUMČINE.

MA DOBRO NEGO DA SE VRNIN NA IZBORI, JUA SA TI BI TU VEČER ISPRI OPĆINE KA SU SE
GLASOVI BROJILI, PA SE NAJEDUNPUT LETRIKA U VIJEĆNICI UGUASI, PA SE JOPE UŽGE, PA
NEKO PROĆULI KROZ FUNIESTRU I ZAVIKNE “DOBI JE” PA ZA DVI MINUTE “NI DOBI”. AJMEEE
TO JE BI ŽIVI ŠOU PROGRAM, A TREBA SI VITI KA JE SAZNUA DA JE STVARNO DOBI…

BIĆE SE OMA ZASVIRALA POBJEDNIČKA TRUBA…

JIE BOGAMI, I ĆUTILA SE JE. PA UNDA LIPO SVI ZAJENO PU SUABIŠĆINE… ALI TAMO SU SE I
GITARE SVIRALE.

AJDE DOBRO JE SA, NIKO MU SE NE HITA NA HAUBU VIŠE, A AKO OĆEŠ DOBITI 100 EURI OD
NJEGA ZA ŽIVITI DVUA DANA, POJ NAMO U FAKEN STRIT, VIĆEŠ 20 MAŠAK I BIRAJ
NAJNORMALNIJU. AKO MORE... DA IMA DVUA OKA I ČETIRE NOGE, OPITURUAJ JE MALO I RECI
MU DA SI JE NAŠA, JERBO NEMUOGU KREZA MUL PRUOJTI A DA NE VIDIN NA OGLASNOJ
PLOČI DA NEKA MUAŠKA FALI.

A ČA ĆEŠ I MUAŠKE SU SE OPAMIETILE KA GRIEDU ĆA IZ OVOGA NAŠEGA LIPOGA MESTA, OVE
SA JEDNIN OKUN GRIEDU PU KUKLJICE KA IN SE JE PUT NAPOKON UČINI, A OVE MALO LIPŠE
MALO SKUPLJE GRIEDU PUT PRIEKA NAJISTI SE NA PEŠKARIJU ILI U HILTONA KA KOD NUAS
NEMORU NEGO MORUAJU ŠIŠMARA ČEKATI.

MA MUČI TAMO!! ČA O MUAŠKAMI GOVORIŠ…

A JE*** MOJA JE SINOĆA TOMBULU DOBILA. I TO U NAŠIN HOTELU. EEEE IMAMO I MI HOTEL,
A ČAJEEE PRIEČANI… MALO JE MANJI OD NJIHOVOGA, ALI NUAŠ IMA BUDILICU SVAKO JUTRO.

MA ČA UNDA NEMORUAŠ NI NA MISU HODITI NEGO SE U POSTELJI DVUA PU IZLAMENAŠ…

MA NI GOVORA, KUA MISA… A KA JE PRIČEST, KALUAŠ SE DOLI U RESTORAN I POPIJEŠ DO
KRAJA MISE DAMIŽANU VINA.

SA KA SMO VEĆ KO HOTELA, PREKO NJIHOVE KOLUMBE SE SNIMI FILM O KALIMI, ALI ZA NAŠE
SELO MALO BI BILO I TELEVISA PRESENTA (MA KUA ESMERALDA, MA KUA MARIČUJI)

PUŠTI TI STUATI KA NUAŠ FILM IMA OVAKOVE ULOGE, ALTROKE BRAD PITT, DICAPRIO, DE NIRO,
SVI SU ONI NULA ZA NAŠEGA SUNTULA.

EE O TUOME TI PRIČUN, VAJK SE CRNIMO I ŠPORKIVAMO, VALJALO BI I ČAKOLI POZITIVINOGA
REĆI… SAMO DA JUA SA TO PROVUN NUAJTI (LISTUA STRANICE TASTAMENTA)

AAAHH DOKLE TI TO NUAJDEŠ… JUA ĆU JOŠ MALO CRNITI. POLICIJA… POLICIJA NAN JOŠ
PUŠE ZA VRUATUN, NEMOREŠ U BAR PUOJTI PIVU POPITI, VEĆ MORUAŠ STRAHOVATI ĆELI TI
DIKOLI PALICU DIGNUTI I PITATI ONO NEUGODNO PITANJE “DOBRA VEČER JESTE LI ŠTO PILI”.

E SAD… AKO SI U FUORMI, DOK UN GRIJE PO ALKOTEST MORUAŠ VEĆ BITI U NISKIN STARTU,
POGOTOVO AKO MISLIŠ TEĆI GORI PU VELE LAMJANE, ALI NEKI SU PROVALI PA NISU USPILI.
ZUATO POBRATINE OD OVIE GODINE MOREŠ POMALO PU UGLJANA SVAKI DAN. PRVI DAN
JEDAN KILOMETAR, DRUGI DAN DVUA, TRETI DAN TRI I TAKO DO KRAJA MISECA, DOK TI
PLUAĆA NE SEDE… NEGO ČA JEE, JESI TI NAŠA ČUA TAMO KOLIKO TO LISTUAŠ VEĆ?

MA NEMUN PUOJMA, VALJA MI SE POGUBILO OD OVIH PUSTIH PAPIROV ČA JE MLADOST
MORALA NA SUD NOSITI… AHA! EVO TI DOBRIH VIJESTI, MLADOST JE NA SUDU DOBILA!!

FALA K*** VIŠE, A KUOGA JE DOBILA?

AA PRIJATELJU MUOJ, O TUOME NIEĆEMO GOVORITI, JER I SUN ZNUAŠ DA OVO I ZIDI IMAJU
UŠI, JIE DA SE VEĆ RASPADAJU, ALI BORAMI I DALJE DOBRO ČUJU.

A KA JE TAKO UNDA SU BIĆE I ČULI PUOČ SU MUASLINE PLUAĆALE VU GODINU.

MA NEGO ČA, A BIĆE ZNUADU I KOLIKO JE LJUDI LUANI POŠLO U DRUGA MESTA MLITI, SAMO
NEVERUJIN DA DO TOLIKO ZNUADU BROJITI.JUA MISLIN…

MA I DA CRIKVU VODU ISTI OTI LJUDI KI SU VODILI NAŠE SELO, BILI BI I TUOTE
OMUASTILI BRK, TO ULJE PRODALI, I OBUKLI ŽUPNI URED U ZLUATO.

ZUATO BI UNDA, LUANI, NA MISI UVELI DA JE MINIMALNI IZNOS ZA LEMUOZINU 5 EURI. JERBO
NEBI ULJILI, A BOGAMI NI PRODUAVALI KA SU MUASLINE PLUAĆALE ISPO 10.

MA DOBRO AJDE JEBALE TE MUASLINE VIŠE, SA BI TI DO SUTRA MLI, A MENI ĆE POŠTA
ZATVORITI A POD HITNO MORUN PUOJTI VITI ZUAČ MI KUVIERTE NA KUĆU VIŠE NE DOLAZI.

EA UNDA SI MORUA VEĆ U REDU BITI… MA ČEKAJ ČA TI POŠTA NE DOLAZI NA KUĆU? KAKO TO?

MA ČA “KAKO NE DOLAZI”!? ČA TEBI DOLAZI?

A U P*** MATERINU, KODA O MENZISU GOVORIMO, KUOMU DOLAZI KUOMU NE DOLAZI,
KUOMU JE DOŠA KUOMU NI DOŠA. JE*** MENI NORMALNO DOLAZI POŠTA A TO SE
ZAFUALIMO ONIMI NIKIMI DIJAMBRLIMI GUGL MAPSIMI I SRUANJIMI ČA POSTOJU DANUASKA,
NE DA POŠTAR MORE VITI DI ŽIVIŠ NEGO MORE LOCIRATI GUO KA SE POSEREŠ JELI
POŠLO U CRNU JAMU U PROFUND ILI DUOLI U MORE.

MA BOGAMI, UNDA BIĆE NI AŽURIRUA OTO GUOVNO OD MAPSA ČA SPOMINJEŠ, PA MOJU
POŠTU UVIK OSTAVI KO DVORANOV. ALI SRIĆA ČA SU PROMINILI U POŠTI RADNO VRIME PA SA
NE RUADU OD PUODNE DO TRI VIŠE.

MA NEMOJ, PA KUO IN JE SAD RADNO VRIME?

A OD PUODNE IPO DO TRI IPO.

MA ČEKAJ, PA ČA NI TO ISTI K*** ČA SI I PRIN REKA.

EEE ZNUA SA DAŠ ME TO PITATI, NI ISTI K***… NEMORE BITI, KA SU PRIJE IMALI PAUZU OD
PUODNE DO PUODNE IPO, A SADA RUADU FORGAS, BEZ STAJANJA I BEZ PAUZE OD PUODNE
IPO DO TRI IPO.

OO OO, UNDA BI BILO DOBRO DA I OPĆINA NAŠA TAKO RUADI KO I POŠTA FORGAS I DA
MOREŠ U BILO KU URU DUOJTI I RIŠITI ONO ČA TI TRIBE.

BI BI, BILO BI DOBRO, VRAGA NEBI, ALI ČA JE PROBLEM, ČA OVA U POŠTI SA ONUN KATRIDUN
PRUOJDE VIŠE KILOMETRI NA DAN NEGO JUA U AUTU, PA BI U TROŠKOVI OPĆINE URAČUNALI I
NOVE GUME ZA KOLA OD KATRIDE, A NA KATRIDAMI IN NI KOLOV.

EEE MA ZUATO BI UNDA MALO VIŠE NJIH SVAKU SEZUONU MINJALI I LJETNE A I ZIMSKE GUME.

NEGO NISMO VAN PRAVILI JOŠ JENU NOVOST… OTVORI SE JE STARAČKI DOM… … … ALI NE KO
NUAS NORMALNO, NEGO U PRIEKUUU.

MAJKO KOLIKO TO PRIEKO SPOMINJEŠ, JOŠ ĆE NEKO REĆI DA JE BOLJE TAMO STUATI NEGO U KALIMI.

EA SLUŠAJ, TO NE ZNUN, ALI NJIMI VODA NE OSTAJE NA CESTI, NJIMI GUOVNA NE SMRDU,
JERBO KAKO JE UŽUA REĆI NUAŠ DRUAGI MJEŠTANIN, NJIHOVA GUOVNA SU LIĐIERA, A I DA IN
ODVODI GRIJEDU U VRTA NEBI NI MORALI KUMPIRI ZALIVATI. AAALII… TO JE PRIEKO I SVAKA IN
ČUAST, A MI SE VRNIMO AMIGO NA OVUAJ STARAČKI DOM. ČA SE OTO IZDOGUAĐALO NEKA
DRUAGI BUOG ZNUA… UGLAVNOM, NI IMUA ČLANSKU ISKAZNICU ODGOVUARAJUĆEGA
KOLURA PA NI DOBI UPORABNU DOZVOLU.

EEE A SADA I JUA IMUN JEDNU IDEJU ISTO ZA ZGRNUTI ŠUOLDI… I POGLJEDAJ TI VO, JOPETA JE
CIJELI DOM ZAMUKA I SVI SU SE U UHO PRETVORILI…

A ČA ĆEŠ AMIGO, RECI IN KA VAKO LIPO SLUŠAJU….

A NIŠĆE I JUA SA ISTO NA SVUOJ PATENT, NA SVOJU IDEJU, DOBI AUTORSKA PRAVA. KOLIKO
IMA NEOŽENJENIH I RASTAVLJENIH U SELU, ČUDI ME KAKO SE NEKO NI SITI OTVORITI
KURBALUK I DA SE ZOVE ‘OPLODI ME’ U ONUOJ HACIENDI OZGUOR VODOSPREME, DA MORU
TI NAŠI RANIJE SPOMIENUTI **** PRUAZNITI. KAKO STVUARI STOJU ZA SAD MORATI ĆEŠ ČIN
ZAVRŠIŠ SREDNJU ŠKUOLU NUAJPRIJE SE ZAPISATI ZA U STARAČKI PA TEK UNDA NA FAKS, AKO
NE MISLIŠ U DUOČIĆ DUOJTI POSERIN I POPIŠUN.

BORAMI UNDA MI SE SVE VIŠE ČINI DA ĆU I DUOJTI POSERIN I POPIŠUN, ALI DOBRO…

A SA, SA ĆU VA PRAVITI ZA OVI MLADIĆI ČA NAN SELO UZDIŽU I VELIČAJU SA OVIMI KLJUČNIMI
MANIFESTACIJAMI OD STREETBALLA, BOŽIĆOV, USKRSOV DO MAŠKAR.

UVIK SE SERE PO NJIMI; DA SU LUPEŽI, DA SU ALKOHOLIČARI, DROGERUAŠI, I KURBARINE, ALI
KA TREBA KUOMU POMOĆI UNDA GRIJE ONA: ZOVI OMLADINU… I OMLADINA SE UVIK RADO
ODAZOVE I POMOŽE NA BILO KI NUAČIN. ALI NIKA NIEĆE BITI DOBRO I JOŠ SE NI RODI KI BI
NUARODU UGODI, A POGOTOVO KUALJSKOMU. CIJENE NA MAŠKARAMI VISOKE,

MA NEKABUDU JOŠ I VIŠE JER TO NE GRIE NIKOMU U TUAŠKU NEGO SE OD OTIH ŠUOLDOV UVIK
PROVUA IZVUĆI ONO NUAJBOLJE ZA SELO. I ČA, SA JE MLADOST U K*** ČA NEMA KRMINE
VEĆ PUAR GODIN I ČA TI ŠUOLDI UVIK GRIEDU U DOBROTVORNE SVRHE!? PA VAS SADA JUA
DRUAGI PUČE PITUN DA VI IZGLASATE JELI NAŠA KUALJSKA MLADOST DANUAS U K*** SA
SVIN ČA ČINU, ILI NI, ILI SU U K*** ONIH PUAR UVIK ISTIH ČA SAMO S*** I S*** I
S*** I S*** PO NAŠOJ OMLADINI?????? JER NE REČIE SE ZAVRAGA: BOLJE DA UMRE SELO
NEGO OBIČAJI.

ALI ZUAČ NIKO NI POGLJEDA NABAVNE CIJENE PIĆUA PA UNDA DOŠA KENJATI… A ČU SA I DA
SE GOVORI DA SE UVIK ISTI PIVUAČI ZOVU…

EEE I JUA SA TO ČU A UNDA BI NUAJBOLJE BILO DA TI ČA SERU DA PLUATU ILI DA BARIN
POGLJEDAJU KOLIKO DRUGI PIVUAČI GUSTAJU. UGLAVNOM, SVI BI JE*** BEZ K*** A TO JE
TIPIČNO ZA NUAS KUALJANI. NIEĆE PIVU PLUATITI 50 CENTI VIŠE NA MAŠKARAMI A HTI BI DA
MU PIVAJU BEATLESI ILI AC/DC. NE GRIE TO TAKO A-AAA. ETO, OVO JE BILO JAČE OD MENE I
NEMUOGU PODNITI DA NEKO UVIK TAKO BRUNTULUA U PRAZNO.

(IMPROVIZACIJA PRED OSUDU)

I ZUATO JUA VUAS SADA PITUN, PUČE KUALJSKI: JEEEEELIIII KRIIIIIV????
- KRIV JE ČA U DOMU INKARAT PADA, I ČA JE KRUOV U SALI IZGNJILI
- KRIV JE ČA VODA NA CESTI OSTAJE, A BOGAMI I ČA SU OLIGNE PO 35 EURI.
- KRIV JE ČA RIBARSTVO PROPADA I ČA SVE VIŠE MLUADIH GRIE VUNKA RUADITI.
- KRIV JE ČA KOLIEGINI DAN DANUAS SMRDU PO GUOVNIMI.
- KRIV JE ČA NEMAMO DI MUALI BRODI NATEZATI.
- ČA JE DIZALICA U LAMJANI ZARUZINALA OD NERADA.
- ČA SE KUALJSKE KUĆE PRODUAJU ŠIPTARIMI.
- ČA SE PREKRŠILA PREDIZBORNA ŠUTNJA.
- ČA SU MLADOST NA SUD DUALI
- ČA CIELO SELO PO PIŠOKI DUAJE
- KRIV JE ČA DEFILEA VIŠE NI
- KRIV JE ČA JE SVE VIŠE POLICIJE PO SELU, A I ZUATO ČA JE PRIEKO BOLJE OD KALI
- KRIV JE ČA JE ZA MURU SVAKE GODINE SVE MANJE LJUDI
- KRIV JE ČA JE IGRALIŠTE NA DRAŽINAMI PRUAZNO
- KRIV JE ČA SE BATALAŽA PRETVORILA U DEPONIJ
- ČA TUNUARA NI KO ČA JE NEKAD BILA I ČA ĆE BITI SVE GOREI

NUAJVIŠE JE KRIV ČA SU RIBARSKE NOĆI PROPALE I DOBILE TITULU NUAJGORE FIEŠTE NA OTOKU

I ZUATOOO SADAAAA NAAAAAAŽGIII GAAAA NAAAAAAAŽGIIIIIIIIIIIIIIIII !
DRUAGI LJUDI DOBRIE VOLJE… TIEŠKO DA ĆE NAMIN BITI BOLJE!